BON BINI, häerzlech Wëllkomm ob den Hollänneschen Antillen

ABC Inselen, sou ginn och nach di Hollännesch Antillen genannt. A fir Aruba, B fir Bonaire an C fir Curaçao; allerdéngs misst et ACB sinn. Esou leien d'Inselen nämlech ronn 40 km virun der Venezualenescher Küst an der Reiefolleg. Di 3 Insele si ganz verschidden, an hunn all hiren eegene Flair. Ideal ass et fir di 3 Inselen zesumme mat Island Hopping ze kombinéieren, wat een zimmlech einfach mat engem klenge Flug vu maximal 40 Minutte ka maachen. Eng Fährverbindung existéiert net. "Dutch Antilles Express" an "Insel Air" fléien e puermol am Dag tëscht den Inselen hin an hier.

ARUBA, „One happy Island“ ass di klengst vun den ABC Inselen, mä eng ganz villsäiteg Insel. Et ass déi Insel wou am meeschte lass ass. Hei leet ee sech scho mol gär an d’Sonn op ee vun deene schéinste Stränn an der Karibik. Niewent dem Relaxe kann een awer och d’Visa brenne loossen, well hei ass alles „Taxfree“. Nom ville Geld ausginn, kënnt dir dann owes an engem vun den Casinoen äert Gléck probéieren. Ausserdeem hutt dir eng Hellewull un Ausfluchsméiglechkeeten zu Aruba. An der klenger Haaptstad „Oranjestadt“ kann een am Hafen en Tour vun 20 Minutte mam Helikopter iwwert d’Insel maachen, woubäi een di schéinsten Andréck kritt. Dir kënnt eng Submarine Fahrt maachen, d’Ënnerwaasserwelt entdecken oder awer och en DeepSeaFishing -Ausfluch maachen, eng Jeepsafari oder eng Quadsafari duerchden Nationalpark buchen, wou dir ënner anerem eng Natural Bridge gesitt, e Ritual vun den Arubaner kënnt matmaachen, an nach villes méi,…

BONAIRE, 290km2 grouss, mat der klenger Haaptstad „Kralendijk“, nennt sech „DIVERS PARADIES“ - hei kënnt all Waasserrat op seng Käschten, Hoteller mat Tauchschoule fannt dir hei iwwerall, mä och Schnorcheler kommen zu hire Gonschten, ech selwer hunn hei d’Schnorchelen entdeckt. Bei enger Promenade laanscht d’Mier kënnt dir d’Fësch an hire schéinste Formen an Faarwen duerch dat glaskloert Waasser bewonneren, oder bei engem gudden Iessen op enger Terrasse. Op jidde Fall musst dir Iech en Auto lounen, an en Tour iwwert d’Insel maachen, wou dir een Dag am „Washington Slagbaai Nationalpark“ verbréngt, an d’Natur genéisst. Riseg Kaktussen, Leguanen an Eidechsen an deene schéinste Faarwen a verschiddenste Gréisste kann een do bewonneren. Op der anerer Säit vum Nationalpark fuert dir laanscht Salinen, Flamingoen a kënnt op enger Terrasse de Sonnenënnerganggenéissen.

CURACAO ass di gréisst vun deenen 3 Insele mat 444 km2. D’Haaptstad „Willemstad“ huet hei sou Munches ze bidden. Eng Kulisse vun Haiser an alle Faarwen, e schéinen Hafe mat der klenger „Emma Bridge“, déi et de Foussgänger méiglech mécht duerch den Hafe vun Punda op Otrobanda ze kommen (wann d’Emma Bridge op ass, gëtt ee mat enger klenger Fähr vun enger Säit op déi aner gefouert). D’Autoe fueren iwwert hir grouss Schwëster „d’Juliana Bridge“. Zu Willemstad hutt dir awer och den deeglechen „Floating Market“, wou Schëffer aus Venezuela a Kolumbien frësch Uebst, Geméis a Fësch op d’Insel bréngen. Net ze vergiessend’Curaçao Brennerei. Hei kenne mir de Blue Curaçao,…deen een och schmaachen a kafe kann. Zu Curaçao kann een ënner anerem dann och en Tour iwwert d’Insel maachen, wou een eng Fahrt duerch de Christoffelpark mat sengen enormen Kaktussen mécht, duerch den High Society Veirel Jan Thiel fiert, an d’Villaë vun ënner anerem der Famill Van der Vaart gesäit, Aloe Vera Plantagen gesäit an e Besuch op enger Straussefarm mécht. Zu Curaçao kënnt dir och tauche goen an d’Ënnerwaasserwelt beobachten. Deen net tauchen an awer schéi Fësch an/oder eng Delfinshow gesinn wëll, kann dat am Seaquarium am Yachthafe maachen. Lëtzebuerg ass hei och bekannt, an zwar duerch eis Schleck-Bridder, déi hei schon Trainingen haten. Och zu Curaçao kënnt dir bei engemgudden Iessen am „Riffort“ oder „Fort Amsterdam“ der Sonn nokucken wéi si schlofe geet oder ganz einfach d‘Insulaner beobachten.

Dës Reesreportgage gouf geschriwwe vum:

Dostert Anne, gebuer den 04.02.1986
Hobbyen: Reesen, liesen, schwammen an Musek lauschteren.

Sinn am 5. Joer bei Voyages Emile Weber a schaffen an der Agence vum Cactus Miersch.
Ech hunn dëse Beruff gewielt well en sou villfälteg ass, well ech gär am Kontakt mat Leit sinn, well ech selwer gär reesen an mech vir Kulture vun anere Länner intresséieren, an ëmmer rëm gär nei Saachen entdecken.
Mäin Dramzil: Australien an Neiséiland.